Bıyldan bastap Tımırıazev aýdanynyń 10 myńǵa jýyq turǵyny gıgıenalyq talaptarǵa sáıkes keletin tirshilik nárin tutyna alady.
Úlken qýanyshqa kenelgen eldi mekenderdiń biri–Dmıtrıevka. Osynda turatyn 600-ge jýyq turǵyn kóp jyldan beri aýyz sýdy tasyp ishetin. Endi aýyl ishine sý kolonkalary tartylyp, kez kelgen ýaqytta paıdalanýǵa bolady. 300-deı turǵyny bar Dzerjınskıı aýyly da sýdy tasyp jetkizetin mashaqattan birjola qutyldy.
Energetıka jáne turǵyn úı-kommýnaldyq sharýashylyq basqarmasy basshysynyń orynbasary Azamat Eleýsizovtyń aıtýynsha, oblystyq qazynadan 59 mıllıon teńge bólinip, 38 shaqyrym sý taratý jelileri qalpyna keltirilgen.
«Byltyr aýdanda sý taratý jelilerin qaıta jańartý, rezervýarlardy jóndeý jumystary júrgizilip, 114 sý taratý kolonkasy, qosymsha 7 qudyq ornatyldy. Bıyl 45 shaqyrym sý taratý jelileri qalpyna keltirilip,167 qudyq qoıylady. Dokýchaevo, Drýjba, Jarqyn, Belogradovka aýyldarynda sý taratý jelisi múldem bolmaǵandyqtan qaıta salyndy», deıdi aýdandyq qurylys, sáýlet jáne turǵyn úı-qurylys bóliminiń jetekshisi Aıbek Qorjynbaev.
О́mir ESQALI,
«Egemen Qazaqstan»
Soltústik Qazaqstan oblysy